أيام ما اتجوزت جوزي كان عنيد قوي تقوليله يمين يقول شمال وانا ست دوغري ما احبش اللف والدوران عشان اطلب حاجه انا عايزاها .. لان ببساطه ده حقي فليه اتحايل عشان اخده .. اللي فات ده الكلام الصح ولكن مَش واقعي في حياتنا
..اي حاجه في الدنيا لازمها اسلوب .. اكيد مَش اسلوب واحد اتربي مع ماما اللي نص الحياه كان عندها عيب والنص التاني حرام الحمد لله
لازم حد يكون اتربي علي المرونه مع المواقف اللي بتحصل حواليه ..وتوظيف ذكاءه في نيل مطالبه بكل أدب واحترام اكيد
المهم كنّا نختلف علي حاجات هبله .. واحنا بره مثلا تتعشي ايه ؟ انا احب اكل حاجه منتقاه ليا مزاج في الاكل .. يعني عادي اسوق مسافه اشتريها..هو بقي وهو جعان اول مكان يقابله يطلب ساندوتش منه وخلاص .. انا ده بيفسد مزاجي العالي.. وهو بيعتبر اني عادي لو اكلت حاجه اسد بيها جوعي وبس.. وتقوم المعركه.. وعدوا بقي مواقف من العينه دي كتشير
مره بقي اختلفنا علي المساعده المنزليه .. انا عايزه واحده مقيمه وهو يقول تنضف وتمشي .. انا اقول ضهري بيوجعني ما اقدرش ابذل مجهود ( بس لساني ومعدتي كويسين الحمد لله)
وهو يقول تيجي تقعد معانا وتشاركنا حياتنا ازاي؟
انا بقي ازعل قوي اقول مش حاسس بيا .. يعني صحتي والا الخصوصيه اللي هو عايز يعيش فيها .. واخود علي خاطري وشفايفي تفضل ترتعش زي البيبي كده واعيط ( الله يرحمك ويسامحك يا ماما.. مربيه قطط مَش بني ادمين)
المهم صديقتي المقربه قالتلي يا هبله .. العيب في اسلوبك .. جوزك راجل كويس بس عايز شويه تحايل كده وفتاكه.. انا طبعا في اللحظه دي وداني كبرت وبقت زي ميكروفون الجامع ساعة صلاه الجمعه ونترت الحجاب وفرقعت الحلق زي الرجل الاخضر لما يتحول وهدومه تتفرتك من عليه.. وكنت مركزه ومصغره عيوني ومطرطقه وداني بالظبط زي ما الضابط في فيلم بوحه بيشرح لمحمد سعد ازاي يوقع حسن حسني في شر اعماله وبوحه مَش فاهم اي حاجه ..
قالت ما تقوليش عايزه شغاله مقيمه .. خليه يكون بيتفرج علي التليفزيون وادخلي اكنسي الارض وبعدين امسكي ضهرك وقولي آاااااه واترمي ع الارض واعملي حالك فقدتي الوعي وبس تفوقي هو اللي هيطلب منك يجيبلك واحده مقيمه .. طبعا انا فاتحه بقي علي الاخر .. قالتلي فهمتي حاجه؟؟؟ قولتلها دي وصفه سهله.. دي وصفه هايله
وجت الليله الكبيره يا عمي والعالم كتيره
وجوزي الحبيب قاعد بيتفرج علي نهائي كأس العالم ( شوفوا بس الجهل في اختيار اليوم اللي اعمل فيه تمثيليتي) اخترت يوم العالم كله علي قلب رجل واحد وجايه اقطع جوزي من العالم عشان اطلب حاجه ممكن تنطلب في اي وقت ربنا خلقه من الرجل الا الوقت ده.. الله يحميني لشبابي شو ذكيه
دخلت اكنس وهو يقولي وسعي مَش شايف .. واقول اه يا ضهري وهو يقول هشش مش سامع ..
انا بقي كست ما بتفهمش في الكوره بربع جنيه مفروض افهم ايه؟
طبعا انه مطنشني ومتجاهلني ومش حاسس بيا.. الدم فار في عروقي وكبكب.. وحبيت اجود في الخطه بتاعه صديقتي وانتقم في نفس ذات اللحظه
قوووم ايه بقي .. روحت منشنه اقع فوق الريموت افشفشه حتت صغيره وانكد علي جوزي .. وما يعرفش يكمل الماتش ( كانه بيتفرج علي دوري المدارس او الشركات مش كأس العالم)
روحت عشان انشن مسكت في الستاره زي افلام زمان لما فاتن حمامه كان يغمي عليها .. تقوم تتشعبط في الستاره تتقطع وتقع .. بكده انزل علي الريموت بالظبط ووقعتي تكون خفيفه لان الستاره ماسكاني شويه ..
وبعيد عن السامعين والقارئين والمتفرجين والعدو والحبيب .. ما تشوفوا اللي شوفته يا رب
جايه باسحب الستاره وارمي جسمي ع الريموت واقول اااااااه .. الظاهر كدهون ( كده) تقلت العيار شويتين وسحبت الستاره قام نزلت هي والبلتكانه فتحت راسي نصين .. بدل ال آااااه بقوا آااااااهين .. شعر..واقول يا لهوتي الحقني يا اخويا باحتضر .. طلعني من كرانيش الستاره وشيل البلتكانه فشفشت الجمجمه ونزلت علي القفص الصدري عملته كاروهات.. ضلع اه وضلع لا ..ضلع سليم وضلع مكسور..
قعد يطلع فيا ساعه وبس طلعت عرفت كان متأخر ليه.. حاط ايديه علي الستاره يخرجني بس عينيه علي الماتش ليفوته الجووووون
بس طلعت باضرب بعيني لقيت الريموت سليم زي ما هو .. جوزي قالي انت بخير قولتله بمب .. الوقعه اللي ما تكسركش تقويك.. انا عمودي الفقري في احسن حالاته الحمد لله الله اكبر ...ممكن تبني عليه عماره.. ما تجبليش شغاله خلاص انا اتعظت قصدي خفيت..اديني بس التليفون بسرعه اتصل علي الكلبه .. قالي كلبه مين ؟
قولتله .. لا دي مستشاره كده اتعينت امبارح بالشركه بس كانت هتقضي عليها فلازم تترفد
#شورتك_سوده_يا_بعيده
#امشي_عدل_ما_تقعش_الستاره_عليك
#الله_يرحم_روحك_الطيبه_يا_امي